يا أهلاً يا أهلاً بكل الحبايب! وحشتوني يا عيلتي الكبيرة، وعارفة إنكم هتحدفوني بالطوب عشان الغيبة دي، بس اسمعوا أختكم "سعاد" وهي بتفضفض معاكم بكلمتين من القلب بدل ما أطق! 😂
أنا والزومبي وسكر "فوزي"! 🧟♀️🩸
بصوا يا جماعة، مصممه المسلسل "حمدية" (اللي هي أنا برضه بس باللبس الرسمي 😂) قررت تخف الرجل شوية وتخلي الحلقات 3 أيام بس في الأسبوع. ليه؟ عشان لقيت نفسي بقلب "زومبي" رسمي!
تخيلوا بقعد أسجل أداء صوتي لكذا شخصيه أغير صوتي من هنا وأنهج من هنا، والحلقات تسجيلها ورا بعضه بيخلي "سكر فوزي" (السكر بتاعي يعني 😂) يضرب في العالي من كتر التوتر والتركيز.. أبقى قاعدة قدام المايك وبقيس السكر ألاقيه بيقولي "ارحمي نفسك يا ولية إحنا داخلين على الجزء السابع مش ماتش كورة!"هو🤗. فقلت يا بت يا حمدية، خدي نفس، وانزلي بـ 3 حلقات "لوز اللوز" أحسن ما نقع من طولنا!
بصوا يا جماعة، أنا وصلت لمرحلة لو شوفتوني فيها بجد هتقولوا لي: "يا حمدية ارتاحي، إحنا مش عايزين حلقات، إحنا عايزينك إنتي بخير". ولادي بقوا يقولوا لي "ياما إنتي ما بتناميش زي البني آدمين ليه؟". بقيت عايشة زي "الزومبي"، بنام ساعتين بالعافية، وعظمي بيزيق من كتر السهر.ده غير المسكنات اللي بقت تسليتي بدل اللب لحد ما جنابي اشتكت مني، ونسيت العلاج والفيتامينات وبقيت باكل أي لقمة خطف عشان "أوفر وقت" للشغل.. طب وده يرضي مين؟أنا يا جماعة ست بيت مصرية أصيلة، يعني ورايا غسيل ومواعين وعيال ليهم حق ياكلوا أكلة حلوة ويقعدوا مع أمهم وهي "فايقة" مش وهي نايمة على نفسها. جوزي يقولي "يلا نخرج" أقوله "سيبني أنام ساعتين أو ألحق أسجل"، بقيت مقصرة في حق مملكتي اللي هي أساس حياتي.. والبيت لو اشتكى، كل حاجه هتقع عشان كده من حقي ومن حق عيالي ان انا اقضي معاهم يوم من غير توتر وياكلوا اكله حلوه معموله بايد امهم
وكله كوم بقى وحكايه المحتوى اللي بيتسرق"عيني عينك" 🎬 مصيبة لما الحلقة اللي بتشوفوها في نص ساعة دي، بكون طلعت روحي فيها (مونتاج، وتصميم، ولبس، وخلفيات). أنا بني آدمة بعمل كل ده لوحدي، مش "ذكاء اصطناعي" بدوس على زرار يطلع حلقة! والحرقة الكبيرة بقى لما أشوف مجهودي وشخصياتي والفكره واسم المسلسل واسم الشخصيات حتى لو عملت منشور على المنتدى ولا فيسبوك الاقيهم اخذوه واخذوا الفكره اللي هم قاعدين لي كده مستنيين اي حاجه اعملها عشان ياخدوها وينفذوا زيها ده غير اللي بياخد تصاميم الفساتين بتاعه الشخصيات ويعدل عليها كده شويه تعديل بسيط وكانه هو اللي عملها والخلفيات والفكره والكلام ده حتى لو انا قلت ان انا تعبانه الاقيهم منزلين ان هم تعبانين كانهم قاعدين كده ما وراهمش حاجه غير ان هم يشوفوا انا بعمل ايه وده حرام ومهما عليته مش هتوصلوا لحاجه عشان انتم ما تعبتوش في المحتوى ده ولا في التنفيذ ولا التصميم ولا الفكره و فاكرين ان انا مش واخده بالي انا واخده بالي من كل حاجه بس قريب جدا هرد على كل واحد رد هيخليه يندم ان هو فكر ياخذ تعبه مجهود غيره هرد بالافعال مش بالكلام هرد علشان تعبي ومجهودي بيتسرقوا من ناس معندهاش ضمير.. كل ده ضغط فوق دماغي لوحدي.
عشان كدة، قررت أخلي أيام (الثلاثاء، الأربعاء، الخميس) لنزول الحلقات، وباقي الأيام لصحتي، وللدكتور اللي مأجلة زيارته بقالي شهور، وليوم أشرب فيه قهوتي وأتفرج على مسلسل وأنا أعصابي هادية.
